ابدعت في رد الجميل

لوخسرتك ماخسرت العمر.....والدنيا متاع
وأدري أني لوخسرتك ماخسرت ..إلاقليـل

بس فكّر زين.. تعرف من خسر فينا ..وضاع
وتعـرف إنّـك لوتلـف الأرض..وتـدوّر بديــل

والله إن تبطي.. ولو لفيت في كل البقاع
ولو تسوّي وش تسوّي ما أنت لاقي لي مثيل

وين تلقى مثل شخصي شخص..وطباعي طباع
ووين تلقى مثل قلبي قلب..أو مثلي خليــل

البشر واجد ..نعم..لكنّ فرق الانطبــاع
يجعلك يمّي تميل ..ويمّ غيري ما تميل

يا رفيقي..انتبه..واحسن إليّ الاستماع
للمواقف دور في كشف المزيّف ..والأصيل

وأنت ما قصّرت فيني موقفك..جدا ُشجاع
طعنتك في الظهر فعلا كانت إثبات ودليل

بيض الله وجهك اللي ساتره تحت القناع
ورايتك بيضا معاي ويا عسى عمرك طويل

يعني أعطيك الثقة وتردّها بـ (لوي) الذراع
ياخي ماشاالله عليك أبدعت في رد الجميل

مدري كيف أشكرك مدري كيف أرد الصاع صاع
كنت أحسب أنك عزيز النفس ..تطلع لي ذليل

كم وأنا عيّيت أصدق فيك قدر المستطاع
من غبائي كنت أسكت وأعذرك ..واثر الحصيل

جرح قلب..ميزته في كل يوم الاتسـاع
ودمع عين ينهمر من ضيقتي... في كل ليل

والله إني كنت أحبك حب.. واتبعــك اتّبـــاع
كنت لجل أرضي غرورك بس أسوي المستحيل

كنت أعمى فيك..لالا..كنت ميّت للنخــاع
كنت مدري كيف؟ لكن كنت صادق معك حيل

كنت أمارس في غرامي لك سياسة الانصياع
وكنت لاغي معك فكرة أعتزل أو أستقيــل

اندفعت بكل ما فيني..وسوء الاندفــاع
يجبر الإنسان أحياناُ..يفكر بالرحيــل

صدمتي فيك إنت...خلتني أفكر باقتنـاع
إن قتل النفس راحة لو أنا كنت القتيــل

انفجر راسي من التفكير..وازداد الصداع
كيف أنا بفتكّ من جرحك ودوشة..قال وقيل

صرت سيرة في حلوق الناس..وتالي هالضياع
انتحــر؟معقـول! ياالله وش هذا الغليــل؟

رحمتك يارب لامن ضاقت امنحني وساع
أنت حسبي في الزمان الجاير ونعم الوكيل

لاغدى..مستقبلي والماضي..أطراف النزاع
وصفحة الماضي سواد وشيء من هذا القبيل

فلازم أنسى لجل أنهي بداخلي هذا الصراع
ولازم أتقوى..عشان أحقق النصر الجليـل

وطالما أن الهجوم أفضل وسيلة للدفــاع
مستحيل أرضخ لو أن الحمل يا ربعي ثقيل

والبخيل اللي نساني واشترى فيني...وباع
يذلف..الله لا يرده... والله بجرحي كفيــل

وأن سأل عني وجاكم بعد فترة انقطــاع
علموه أني نسيته بس أنا ماني بخيــل

طالما كان السبب في قوتي.. قبل الوداع
بلغوه أقل شيء بخالص الشكر الجزيــل