الـــــــــــضـــــــيـــق.....!!

الضيق .. باب ٍ مشرّع دون خلاني
والصبر في داخلي شابت مداهيله

محبط ، مشتت .. قلق من وين تلقاني
اشبه بمعدوم فقره ما عد يعيله

قليل تسمع لصوته صوت ومعاني
ابلغ كلامه بعينه .. سجن تاويله

على كثر ما الكلام يدور بلساني
جردني الحزن دمعه في مواويله

اول بني ادم .. احزاني لها احزاني
تصدق (الجرح) يهدي (جرح) منديله !

بلشان من وين جيته جيت بلشاني
بلش به الهم من كثرة غرابيله

ما عاد له في المدن غنوه ولا اماني
وجرح المحطات حزنه في تفاصيله

كن الشوارع بعينه مالها ثاني
نهاية الشوف بيت اللي هدم حيله

احيانه انسان .. شبه انسان احياني
يلومه الظل لو ميّل على ميله

اللي بلاني وانا اشكي منه واعاني
فريد طبعه وجنسه في بني جيله

حبه ملكني ملكني كثر م ابكاني
على وصاله كثير الوقت وقليله

سقاني المر والعلقم ولا اسقاني
الا وانا راضي بهمه وتعليله

صورته في (الدسك توب) بسطح وجداني
يسرقني الدمع غدره كل ما اومي له

سبحان من صوره .. كنه على شاني
كله على بعضه اطباعه وتشكيله
ا
للي عيونه عيون الحر الايراني
اومن بلا شك في كثرة مقاتيله

ما بين نهده وعنقه روض بستاني
عن وارد الما تجيّش في مناهيله

والخصر غض ٍ نحيل وورك ملياني
من فوق متنه يدوب تلمّسه شيله

والردف لا ماد .. خصره منه يعاني
تذوب في غطرسته اكبر تهاويله

حرمني النوم ليت النوم به جاني
وحرمني الصبح .. من لذة فناجيله

ويوم استوينا عزمت ورحت له عاني
واوقدت جمر السوالف في معاميله

لكنه الحظ .. ذاك اللي تحاداني
والضيق صدر ٍ ضلوعي عيت تشيله