يرضيك يعني ؟!.. إذا يرضيك علمني

يااا كيف نامت عيونك وانت ظالمني
وآنا عيوني تعاف النوم لو تزعل

أسهر وقلبي لاجل عينك يخاصمني
كني انا اللي خطيت ولازم اتحمل

معذور قلبي اذا لاجلك يألمني
طبعا حبيبه .. ولو عاذلت ما يقبل

ما يرتضي فيك ما يسمح يكلمني
يغرق بصمته .. ومني يزعل.. اتخيل!!

لو جيت ابعد شعوري فيك يلزمني
وان جيت قلبي لقيت القلب لك ميّل

وان جيتك انته من الفرقى تلملمني
تجمع شتاتي لقيتك .. كن تتجمل!

تمنع .. وتاخذ .. وتعطي .. تقترب مني
توصل .. وتقطع .. وتقسى .. تظلم .. وتعدل!!

توهتني في غرامك ليت تفهمني
بعثرتني ليت أفهم وين انا بوصل

جنوب وشمال .. غرب .. وشرق توهمني
جهاتي اربع وانته الخامسه.. تكمل!

ما كنت قاسي ولا في يوم تحرمني
\بالعكس .. توصل .. تبادر .. تمتثل .. تسأل

وان غبت عنك غلاك بشوق يلثمني
لكن حسافه تغّير نهجك الاول ..

واليوم ناظر فراقك كيف أزمني
صابر وليلي من الحرمان صار أطول

يرضيك يعني ؟!.. إذا يرضيك علمني
أبشر وعيني بمرواد السهر تكحل

وش بيدي دامك بأمر الحب تحكمني
أحكم حبيبي ترى من حب يتحمل