يعني كذا

يعني كذا وبْلا سبب تهجريني

حقّك علي يالقاسيه يالعنيده

مادام حبّي يزعجك سامحيني

برحل أنا وقلبي لدنيا جديده

ماعاد أبيها دنيتك اعذريني

يكفيني جْروح وصدود ٍٍ مكيده

حبّك كسرته كالزجاج بْيديني

يعني صعب أرجع ألمّه وأعيده

ياليت ماسكّنتك بْوسط عيني

تركتك أرحم عن جفوني بعيده

لاواحسايف مامضى من سنيني

كلها تعاسة وأرجي لحظه سعيده

يطلع صباحي والضحى يكتويني

وتغيب شمسه والليالي وقيده

توقد لي هم ٍ يشتعل في حنيني

وأناجي القمرا وأعانق قصيده

ياما شكيت وقلت يكفي ونيني

حبيبتي أنتي حكاية فريده

من هو عرفها حال بينك وبيني

وصاح الملا لي فارقه قبْل عيده

حسبي على قلبي جبرني يبيني

أصبر على قلبك وأنا ما أريده

يْقول أكيد يْحن وبكره تجيني

ترى محبتنا محبه وطيده

يالله ياقلبي أنت منّي وفيني

وأنتي وقلبك ابعدوا عن وريده

مادام حبّه يزعجك سامحيني

برحل أنا ويّاه دنيا جديده