عللى قصرٍِ من الحب بانيه

ياهيه ياللي تاصل الزين ياهيه
بوصيك ياللي تاصل الزين قلّه

قلّه على لْساني كلام ومشاريه
وقلّه صدوده زوّد القلب عله

وقله فراقه متعباً روح مغليه
وقله عشانه صافي الدمع هله

وقله حبيبه يسهر الليل يرجيه
يرجي ولكن مطلبه ما حصلّه

وقله سؤالٍ مشغل البال وأبغيه
يعطي جوابٍ واضحٍ بالأدله

وشفيه عنّي مبعدٍ حيل وشفيه
وشفيه صد وبدّل الحب ذِله

مايدري بحبٍ عن الناس مخفيه
حبٍ شريفٍ مايجي فيه زله

وأنّه هنا .. في وسط صدري مداريه
والقلب عنده من زمن مستحله

وآ تلّ قلبي كل ماحل طاريه
تله .. وتتبعها ثمانين تله

من غيره اللي أعشقه حيل وأغليه
ومن غيره اللي من البشر ما أمله

ومن غيره اللي يمرّني طيف وأدعيه
حتى قصيدي يحتفل فيه كله

وأن كان زينه هو سبايب تغليه
فالورد زين ولكن العيب ذبله

هذا مثل هذا.. وعطره يشاديه
والكل منهم يطرب الروح والله

لاهنت ياللي تاصل الزين وصّيه
خله يصون الحب والعهد خله

ويلحق على قصرٍِ من الحب بانيه
بين الظلوع العوج حروة محله

ساسه غلا وكثر المواصل ينمّيه
لايموت حبه ويقْلب الحب غله

وآعاهده عهدٍ من الروح بفديه
وأبيع كل الناس وأقعد بظله