ماعاد .. تفرق معي .. لو نفترق .. للأبد ،

عندي من ( الكبت والتلويع والانغلاق )
كلام .. من لاتكلم .. في حياته .. أبد !

من غبت ماني بمع نفسي .. بحاله وفاق
ومن كان مثلي .. يعاني .. لو لحاله قعد !

شاعرك قيد لسانه .. من بعدك .. بوثاق
مبطي على قول ( صح الله لسانك مدد ) !

من كثر .. ماحن وإحساسه تبلد وضاق
ما أكذب .. ليا قلت حتى في رجوعك زهد !

بعض المشاكل بسيطه .. حلها في العناق
بلاك باللي .. يكبرها .. بكثر .. ( العقد ) !

وين أتصدد عن ( الذكرى ) وبالي يساق ؟
البال .. عن ذكرياتي معك .. ماله مصد !

أتضايق الحين .. وأرقد بعد شق الزراق
ماكني اللي من أول .. لاتضايق .. رقد !

لو شفت وجهي بعد ماغبت من الاشتياق
تشوف .. فرق الملامح بين .. ( قبل وبعد ) !

الضحكه اللي مهي واياك ضحكه نفاق
والكلمه .. اللي مهي منك .. زياده عدد !

كل وجه من بعد وجهك شوفته .. لا تطاق
ألا سعد عين من شافك .. ياوجه السعد !

ما توصل الكلمه .. الا من خلال السياق
ومايشعر .. بقيمه المفقود .. من لا فقد !

لي قلب من كثرة ( التجريح والاختناق )
لو أتركه في ( المياتم ) .. ماتبناه .. أحد !

فيني من الحزن مايشبه لحزن العراق
وفيني من الكبرياء .. اللي يكفي .. بلد !

مافيه داعي .. نمثل .. بيننا .. الاتفاق
شف كيف الأحساس مابيني وبينك برد !

غيبتك .. كانت عبارة .. عن بروفة .. فراق
ماعاد .. تفرق معي .. لونفترق .. للأبد !!