النّفس طابت ، ونزف الجرح منْهَلِّ

لامِن حان طاري فراقه و التسلّي ..

سلواك ي نفسي عسى الله يجبرْها

قبل امس روحي تِهتِني قُرْب خِلّي

واليوم لا والله على الصدّ مِكسِرْها

و مابين عام الحب ، و فرقاك .. ياللي

أجْمَع بك الهقوات ... واعَوِّد أنثرْها

البعد صعب ! على روحي على كلّي

شِف لك طريقة .. إذا ودّك تبرّرها !

اما اعيشَك مدَى الترحال .. والحِلِّ

ولاّ تراني .. جفاني صبر آخرْها

لآني أبَرضَى ، وقوفَ الهون والذّلِّ

ضيّعت عمري! ولا هلّت بواخرْها

ولآني أبتبع .. حنيني لو يصوِّرلّي

جنّات وعدك ، رماد الفقْد يسعِرْها

النّفس طابت ، ونزف الجرح منْهَلِّ

والجرح ذكرى مصيرك يوم تذكرْها !